اصحاب في الطريق
عاوز اقولكوا ان شروق وعدتني انها هتاخدني في حضنها وتخبيني من ارف الدنيا .. عاوز اقولكوا ان شروق كمان هتخليني انام جنبها في حضنها وتطوقني بدراعتها .. عاوز اقولكوا اني احتمال اعيط يومها او عشان اكون دقيق ادمع لان انا مبعيطش بطبعي .. احتمال كمان نشرب مع بعض وننسي حاجات كتير .. عاوز اقولكوا ان شروق دي حلوه من جوا وطبعا من برا
………………….
عاوز اقولكوا ان صاحبي صلاح قاللي انت تعبت معانا كتير وليك فضل علينا ورجعتلنا الامل في احلامنا وحقك علينا ان ارجعلك احلامك تاني … قاللي بتحب باريس .. صح
قلتله اه .. بس دا في حد ذاته مش حلم
قاللي ولندن برده
قلتله نفس الكلام
استخبي يومين وجالي قاللي بتحب الكتب ياض يا عبده ولسه هيكمل
قلتله فاكس انا بطلت كتب من ٨ شهور وبقيت بكرها
ولازال البحث مستمر
بس عاوز اقولكوا اني اترجيت من جوا وعيني اتملت دموع نشفت قبل ماتنزل عشان خاطر كلمة ” حقك علينا كاصحابك نرجعلك احلامك تاني ”
…….…………
اماني قابلتها الاسبوع اللي فات وكنت فرحان جدا لدرجه اما دخلت الكافيه وكلمتني من جوه لانها مش شايفاني وانا قايم كسرت الكاس
المهم بقي حضنتني اوي وكنت مبسوط وتقريبا تاثير الحضن راح فربنا بعتلي شروق
6
